Wan Ni-Vanuatu seasonal wokman i ded

Wan wokman blong Vanuatu long Seasonal Workers Program long Australia, i lusum laef blong hem long wik ia.

Commissioner blong Labour, Murielle Metsan Meltenoven, i konfemem ded ia long VBTC long tete.

Hemi talem se, “Mi stap konfemem se, leit Arnold Archie blong Nguna aelan i pas awei long Adelaide Hospital yestete long naet, mo High Commission blong Vanuatu long Canberra i konfemem tu nius ia long wan email.”

“Hemi wan taem we yumi no bin expektem blong i hapen olsem mbe i hapen.

“Naioa mifala long Ofis blong Labour Department bae i wok tugeta wetem High Commission blong Vanuatu long Canberra wetem employee blong leit Archie, blong lukluk long repatriation blong ded bodi i kambak mo yumi hop se long manis ia, sapos i kat eni flaet i availabol blong ko long Australia blong tekem ol wokman,” Mrs Meltenoven i talem.

Leit Arnold Archie blong Nguna. Photo: Wan SWP wokman.

“Mi tekem taem ia tu blong talem sori mesej blong mi, i ko long olketa famili mo spesel wan i ko long mama blong leit Arnold long nius ia.

“Prea blong mifala i stap wetem ol famili long sad taem ia, mo prea se soul blong leit Arnold bae i res long pis blong Papa God.”

Mrs Meltenoven i talem se hemi seken taem, we leit Arnold Archie, i ko wok long Australia blong pat long Seasonal Workers Program.

Hemi talem se hemi kat 29 yia mo hemi wan los long seasonal program tu long Australia.

“ I kat allegation se leit Arnold i bin kasem kil folem wan faet wetem wan boy Tonga long namba 30 July, long taem we oli bin dronk, mo hemi lid i ko long kil we hemi kasem long hed blong hem, mo hemi bin admit long Adelaide Hospital,” Mrs Meltenoven i talem.

“Mi apil bakeken long ol seasonal wokman blong Vanuatu long Australia mo New Zealand, blong mas lukoutem gud olketa oltaem.

“Yumi stap long wan jalenj taem folem COVID-19 pandemic mo ol boda i lok, ol seasonal wokman i nosave travel i kambak afta we kontract blong olketa i expae, mo mi askem patience blong olketa wetem kavman blong Vanuatu, taem kavman i stap wok long ol repatriation, blong plis lukaotem gud olketa.”

Mrs Meltenoven i talem tu se alcohol i no mas kam fes wan long laef blong olketa wokman.

Hemi talem se ol wokman i mas tinkbaot famili blong olketa long Vanuatu.

“Kavman mo Departmen blong Labour i no foketem ol seasonal wokman we oli stap yet ova sea, mo bae mifala i wok had blong mekem sua, se everi wan i kambak hom sef long ol nekis repatriation flaet, we kavman bae i lukluk long hem,” Mrs Meltenoven i talem.

 

 

 

 

 

 

(Visited 4424 times, 1 visits today)

About The Author

You might be interested in