Wan niu lanline blong sapotem ol viktim blong domestic violence

Vanuatu Womens Center i kat wan niufala fri lanline blong ol viktim blong domestic violence i save kolem blong kasem help kwiktaem.

Coordinator blong Women’s Centre, Tatavola Matas, i talem se lanline ia bae hemi helpem olgeta big wan blong provaedem konseling long ol women mo kel raon long kaontri.

“ Konseling seves line mo long trial we Vanuatu Womens center i ranem, mifala i yusum tu olsem wan referel patwei we samtaem ol pipol oli nosave kasem polis long ol aelan mbe kasem ol netwok blong mifala long ol aelan mo oli save rijim netwok ia blong save kasem polis long ol remote eria,” hemi talem.

High Commissioner blong Australia long Vanuatu, Sarah deZoetan, i talem se hemia hemi wan long time drim blong Womens Centre.

Hemi talem se “ Vanuatu Womens center i sud kat wan fri namba olsem ol nara esensiol seves we hemi polis, hospitol mo medik.”

“ Mi andastand hemi wan long ol drim blong woman council mo naoia yumi stap tete blong witnesem drim ia i kam tru,” Mrs deZoetan i talem.

“ Jalenj ia hemi wan jalenj we yumi everi wan i fesem tuketa mbe yumi mas stanap strong tuketa blong talem no long domestic violence mo talem se fasen ia hemi no stret.

Wan women Advocator, Yasmine Bjornum, i talem se 16 dei aktivisim blong yia ia hemi wan tribut i ko long 40th aniverseri blong Independence blong Vanuatu.

“ Tete violence akensem ol women mo ol kel hemi stil hae,” hemi talem.

“Wan spesel video we oli kolem “Respect hemi honorable”, bai hemi kamaot long Television blong Vanuatu mo ol nara media platforms.

“16 dei blong aktivisim i stat long wik ia mo bae i finis long namba 10 December mo insaed long ol dei ia bae kaontri i lukluk long ol ajivmen mo impotens blong six difren human right convention we kaontri i bin signem.”

Fes wan, hemi Disability dei we bae i tekem ples nekis wik long namba 3 December.

Fulap long ol convention ia hemi blong promotem bigwan sefti mo proteksen blong ol woman mo kel.

Director General blong Ministry blong Justice, Dorosthy Kenneth Watson i lonjem niufala fri line blong Women center we hemi 161.

Long wik ia, wan parade hemi tekem ples long Port Vila blong laonjem 16 dei aktivisim.

Respek hemi main theme blong yia ia.

 

 

(Visited 84 times, 1 visits today)

About The Author

You might be interested in