Wan olfala i lus long Merelava

Merelava i stap lukaotem wan olfala man we i lus blong 20 dei nao.

Niu Elek Kaonsela blong Torba Provins, Edmond Sovan, i konfemem nius ia tete long VBTC Nius.

Mr Sovan i talem se olfala man ia nem blong hem hemi Mofet Tula.

Hemi kolem Torba Polis blong help sendem wan tim blong faenem olfala ia.

“Hemi bin lus long Decemba 2021 vinis mo hemi abot 20 dei we hemi bin lus,” Mr Sovan i talem.

“Mifala i no bin faenem hem sins long dei we hemi lus mo ol famili i stap mekem ol kakae blong ded nomo naoia. Mifala i nosave se hemi ded o lus olsem wanem.

“Yumi save se Merelava hemi wan smol aelan nomo long Torba mo taem man i lus, bae ol lokol i mas faenem mbe kasem tete mifala i no faenem hem yet.”

Mbe Torba Polis i talem long VBTC Nius tete aftanun ia, se oli kasem ripot blong man we i lus ia wan wik tri dei i pas afta long lus blong hem.

Torba Polis i talem se oli bin toktok wetem Polis Commanda long Luganville, Santo, mbe hemi talem se taem frame ia hemi longtaem tumas mo bae oli nomo save search mbe letem ol komuniti nomo i help.

Torba Polis i konfemem tu se solwota i raf tu blong aot long Sola i ko long Merelava. Ripot we Polis Torba i kasem se man ia hemi bin aot 1500m aot long vilij blong hem. Mbe taem oli ko lukaotem hem oli nomo luk eni trak blong hem.

Torba Polis i talem se oli kasem ripot se olfala man ia i kat ova 55 yia mo hemi blong Aota vilij long Merelava.

 

 

 

 

 

(Visited 1342 times, 1 visits today)

About The Author

You might be interested in