Wan seasonal wokman i lus

Labour Dipatmen i konfemem ded blong wan Ni-Vanuatu seasonal wokman long New Zealand long wiken.

Commissioner blong Labour, Murielle Metsan Meltenoven, i talem long VBTC Nius se kos blong ded blong leit Nick Sambo i no klia yet.

Hemi talem se ded bodi blong hem i stap long hospital blong oli mekem autopsy blong faenem kos blong ded.

Mrs Meltenoven i talem se long steij naoia hemi nosave konfemem se seasonal wokman ia i ded long heart atak.

“Mi no kasem yet ripot blem blong konfemem stret wanem kos blong ded blong hem,” Mrs Meltenoven i talem.

“Taem mi kasem ripot, bae yumi save talemaot wanem nao kos blong ded.

“Mbe long stej ia hemi eli yet blong yumi save talem aot se hemi ded from heart atak.”

VBTC Nius i andastan se leit Nick Sambo ia i blong Mele vilij mo hemi stap long age blong 40’s.

Mrs Meltenoven i talem se taem oli kasem infomesen blong ded bae oli wok long wan repatriation flaet blong tekem ded bodi i kambak long Vanuatu.

“Labour Dipatmen i talem sori bigwan long ol family blong leit Nick Sambo,” Mrs Meltenoven i talem.

“Hemia i wan los long program blong Recognised Seasonal Employer scheme from oli wok mo kontribut long economik blong New Zealand mo Vanuatu.”

Plante pipol oli bin ko online blong sherem sori long famili blong leit Nick Sambo.

Hemia hemi seken seasonal wokman we i ded long New Zealand long yia ia, fes  ded i bin hapen long wan kwarentin fasiliti long eli yia.

Kos blong ded hemi heart atak.