Wan tausen RSE wokman bai oli kambak long kaontri

Araon 1000 seasonal wokman bae oli ripatriatem olgeta long New Zealand stat long Fraedei.

Darekta blong Foreign Affairs, Yvon Basil, hemi konfemem.

Mr Basil, i talem se ol flaet ia bai hemi stat long Fraedei mo ko kasem long nekis wik.

Hem i talem se bigfala wok blong repatriation ia i stap kohed naoia.

Daerekta blong Public Helt mo COVID-19 Spoksman, Len Tarivonda, i talem se from we bai i kat 1000 oli repatriate bae  Vanuatu hemi ekspektem blong kasem tu flaet long wan dei blong New Zealand Royal AirForce Plane.

“Wan flaet bai hemi karem araon 130 pasenja,” hemi talem.

Comisiona blong Labour, Murielle Meltenoven, i talem se aot long ova 3000 seasonal wokman we oli stap long New Zealand, 1500 oli kat nid blong kam bak, be folem limited capasiti blong kwarentin bae i kat 1000 nomo we bae oli kam fastaem.

Comisiona Murielle Meltenoven i talem se bigfala namba ia hemi stap kam bak folem wan survei we hemi soem nid blong oli reten mo oli kam anda long tri kategori.

“Wan hemi olketa we oli nomo kat wok, nara wan hemi olketa we oli kat helt problem mo olketa we oli kat famili problem,” hemi talem.

“New Zealand Kavman hemi agri blong fandem flaet blong olgeta.”

Comisiona Meltenoven hemi enkarejem ol Recognised Seasonal Employer (RSE) wokman ia blong oli mas folem ol rul blong COVID-19 long taem we oli stap travel i kam bak long kaontri.

Ms Meltenoven hemi kol long olgeta nara 2000 seasonal wokman long New Zealand mo ova 2000 Seasonal Workers Program wokman long Australia blong oli patient wetem kavman kasem taem we oli save kambak.

Wan long ol seasonal wokman ia long New Zealand i talem se oli glad tumas long nius ia.

(Visited 3297 times, 1 visits today)

You might be interested in