Warning blong Red Tide i stap yet

Dipatmen blong Fisheries i wonem ol pipol long sam pat blong North Efate blong no ko long solwora yet, folem Red Tide.

Deputi Daerekta blong Fisheries Dipatmen, Sompert Gereva, i talem long VBTC se Red Tide ia i bin muv aot vinis long sam dei i pas mbe ol komuniti kolosap oli no alao yet blong ko long rif o slowora blong kasem fish o shell.

Hem i talem se saotis win i bin bloa mo muvum aot Red Tide ia.

Hemi talem se tide ia i bin muv aot tu long Moso mbe hem i no sef yet blong pipol long eria ia i ko long solwora o long rif.

“Ol pipol bae oli luk se Red Tide i ko mbe hemi moa gud blong no ko kolosap fastaem from oli mas tinkbaot helt mo sefti blong olketa wetem ol pikinini,” Mr Gereva i talem.

Deputi Daerekta ia i talem se tim blong Fisheries i stap wok long ol eria ia mo sapos i nomo gat eni saen blong Red Tide bae oli jas letem ol pipol i save sapos hem i sef blong kobak long solwora o rif.

Plante man long North Efate i talem se oli bin fraet blong ko long solwora mo ko fishing mo oli bin spelem smel blong Red Tide ia taem solwota i dry.

Mr Gereva i talem se hemi impoten tu blong pipol i manajem gud waste long graon.

Hemi talem se “Bifo you yusum wan samting long graon yu mas save wanem nao impak blong hem espeseli olketa long sekta blong agriculture mo livestock.”

“Samtaem yumi no tinktink strong mo yumi bildim ol fam kolosap long ol riva mo even yusum ol fertilizer long ol ples we i stap long ol hill o kolosap long riva mo taem ren i ren, everi doti ia i ko daon long solwora,” Daerekta Gereva i talem.

“Mo yumi ol pipol we i stap long ol coastline tu long ol komuniti, oltaem yumi stap sakem doti i ko long riva o ko long rif long solwora, o yumi bildim toilet mo fidim pig kolosap long solwora, wan wei yumi manegem yumi blong no mekem doti mbe long narasaet long hem, plante doti i stap ko daon long solwora.

“Mo long en blong dei, ol doti blong sho i kam ko lo solwora mo i pile ap afta i kosem ol samting olsem Red Tide.

“Red Tide i mekem nalumlum i gro ariap blong kilim tet ol rif mo hemi save kam poison.”

Daerekta Gereva i talem se “Aksen blong yumi ol man long sho hemi impoten blong yumi tinktink blong no spoilem nara pat blong environmen blong yumi mbe putum gud ol doti long stret wei.”

“Dikim toilet longwe long coastline blong katem daon amaon blong doti we i stap ko daon long solwora.”

(Visited 26 times, 1 visits today)

You might be interested in