Weta woning long La Nina

Ol fama i kasem woning blong harvestem ol lokol kakae we i redi mo sefem folem ren we bae i kam bitim nomol renfol.

Climate Division Manager, Allan Rarai i talem long VBTC Nius se Vanuatu bae i fesem bakeken blong namba tri taem long yia ia, La nina we ren i ren plante.

“La Nina i form vinis, ol pipol i mas awea from ren bae i dabol long nomol wan,” Mr Rarai i talem.

“Ol bigfala rain olsem we i stap hapen long ol aelan blong yumi long Vanuatu fulap taem, i mekem ol pipol oli save gud olgeta impact we rain i save kosem olsem flad, lanslaet mo sam narafala impak.

“Ol fama we oli planem ol lokol kakae i mas tekem infomesen ia i impoten.”

Agriculture Director, Antoine Ravo i stap singaotem ol fama naoia blong stat harvestem ol fruit tri olsem mango mo watermelon blong ren i no spoilem.

Mr Ravo i talem se ol root crop olsem manioc, yam, banana i mas harvest mo sto long wan sef ples.

“Sefem kakae blong i stap long gudfala ples mo i kwaliti.” Mr Ravo i talem.

“Katem gud ol branch blong manioc mo cabij mo putum gud blong planem bakegen.”

Mr Ravo i apil long ol fama blong no planem kakae long eria we i low mo i kolosap long wota.

“Muvum garen i ko long wan hae graon blong wota i no spoilem olgeta,” Mr Ravo i talem.

Mr Rarai i talem se long septemba 13 2022, ol aelan blong vanuatu i stat finis blong luk plante rain. Hemia i minim nomo se ren we bae i foldaon bae i no semak olsem ol nomol ren fol from bae i moa..

“Rainy sisen we vanuatu i stap ko tru long hem, hemi long manis blong October, November mo December, be La Nina we yumi i stap fesem naoia, hemi hapen aotsaed long nomol sisen,” Mr Rarai i talem.

“ Taem i kat wan la nina, i save mekem namba blong saeklon i inkris, mo long past experiens fulap saeklon i fom.

“Ol kaen event blong La Nina olsem i bin stap hapen finis bifo i kam. Hem i talem se event blong la nina ia i bin hapen long 2020 kasem 2021, 2021 kasem 2022 mo 2022 bae i stap kasem 2023.”

Mr Rarai i talem se tropikol saeklon outlook bae i kamaot i no longtaem.

(Visited 440 times, 1 visits today)

About The Author

You might be interested in