Wok blong stopem sale blong state symbol

Ministry blong Internal Affairs i talem se sale blong national state symbol long ol shop i wan konsen mo hemia i illegol.

National symbol blong Vanuatu hemi tut blong pig, leaf namele, coat of arm, motto we i stap olsem ol identiti blong kaontri anda long cap 107 blong constitution o mama loa blong Vanuatu.

Policy Liaison Ofisa long Ministry blong Internal Affairs, Allan Liki, i talem se tingting blong mekem review mo mekem sam amendment o jenis long Cap 107 long mama loa hemi blong loa i dil wetem ol pipol we oli stap salem ol klos o calico we i kat ol symbol ia.

Mr Liki i talem se plante bisnis long Port Vila i nokat rispek mo stap salem ol calico ia long ol shop blong olgeta.

Hemi talem se fulap bisnis haos i stap misusum ol impoten symbol blong state.

“Naoia bae yumi lukluk blong stopem ol import calico we oli kam in long Vanuatu mbe oli kat ol national symbol blong yumi long hem lem,” Mr Liki i talem.

“Bae yumi banem o putum tabu long hem.

“Sapos oli kam long ol difren design bae yumi no stopem.”

Mr Liki i talem se taem oli somapem ol calico ia mo mekem aelan dress long hem i nokat rispek

Long wan inspeksen we compliance tim blong Ministry blong Internal Affairs i bin kondaktem long yia ia, oli faenem se plante bisnis long Port Vila i fail blong pem permit blong salem ol copy right state national symbol we i stap long ol calico olsem ol design mo kala blong national flag blong Vanuatu.

Compliance Manager blong Ministry blong Internal affairs, Ken Malalo, i admitim se ol kaen inspeksen olsem oli kondaktem long evri yia mbe fulap bisnis oli no stap komplae blong pem fi blong olgeta.

Hemi talem se hemi wan mas blong wan bisnis i pem permit long evri yia blong save alaoem olgeta blong salem ol calico wetem ol state symbol ia.

Mr Malalo i talem se long cap 107 i statem i klia se eni wan we i wandem salem o displayem copy blong state flag o ol national state symbol.

“Mo minister blong Internal affairs nao bai i apruvem mo givim permit blong person ia,” Mr Malalo i talem.

“Permit we yumi stap kivim aot hemi beis long anuol riten blong wan shop o bisnisman.

“Sapos long wan yia, wan bisnisman i mekem aroan VT3 million bae hemi pem aplikesen fi long VT 2000 mo permit blong VT10,000.

“Mo sapos hemi earnem ova long VT 3million long wan yia bae apliksen fi hemi VT5000 wetem fi blong permit we hemi VT 55,000.”

Compliance Unit long Ministri blong Internal Affairs i stap reviewem loa blong national symbol mo pasem long Palamen blong hemi mekem sam jenis long cap 107 long eli 2021.

Semak inspeksen ia bai oli mekem long ol bisnis haos long Santo i no longtaem.