Wokbaot blong stopem violens long komuniti

Wan candle light parade i kol blong moa fokas long ol man we oli stap kosem raorao mo kilim nara man i ded.

Acting Coordinator blong Womens Center, Vola Matas, i talem se oli disaed blong march tuketa blong klemem bak raet blong ol man, woman, ol gel mo ol pikinini blong stap long wan sef hom o komuniti.

Hemi talem se march ia hemi blong tinkbaot tu ol pipol we oli bin lusum laef long ol rod mo ol pablik ples tru long violens atak.

“I nokat eni excuse blong violens, yumi evri wan i kat fridom blong muv araon,” Ms Matas i talem.

“Ol man we oli stap mekem ol strong fasen olsem, oli mas risponsibol long aksen blong olgeta.

“Yumi nosave kontinu blong rimaendem ol woman, ol gel mo ol pikinini se oli stop blong walkbaot long naet, o walkbaot leit long naet, werem ol shot taet long jeans from hemi no sef mbe stopem rabis fasen we ol man i stap kontinu blong mekem.

“Plante taem, ol man, woman mo ol gel oli fesem harasmen mo abuse long ol rod mo pablik ples from naoia laef i jenis sam oli askem mani long rod nomo.

“Yumi evri wan i kat raet blong yumi walkabaot long wan sef rod mo ol pablik ples long naet.”

Wan lokol, Florida Kalotiti, we i bin pat long march ia i talem se “Olsem wan woman hemi kat raet blong muv araon mo no wari long sefti blong mi.”

Wan sos i talem long VBTC se hemi sapotem match blong yestete long naet long Port Vila.

“Olsem wan yangfala boy, mi tink se fasen blong kilim woman i nogud,” hemi talem.

“Mo yumi ol man i mas stop blong kilim woman.

“Ol woman oli no semak, i kat sam we fasen i gud mo sam we fasen i nogud mbe mi mas talem stret, se sam fasen we yumi ol boy i stap mekem tu i no stret olsem singaot ol gel mo toktok kranke long olgeta taem oli walkbaot long rod.

“Mi mas admitim se mi tu mi stap mekem kaen fasen ia mo mi kam blong luk se i rong.”

Sos ia i talem se ol woman oli mekem plante wok long hom, vilij mo wok ples.

“Hemi taem yumi soem rispek long yumi bakeken,” hemi talem.

Ms Matas long Vanuatu Women Center i talem se long las yia 2020, i kat sam woman mo wan yangfala boy i lusum laef tru long fasen blong violens.

“Long tete naet, yumi walkbaot, yumi tinkbaot, Elina Vira we oli bin faenem ded bodi blong hem long Joint Court eria long May 2020,” hemi talem.

“Yumi tinkbaot Roslyn Weting Roga blong Gaua we man blong hem i bin kilim long November 2020.

“Caroline Alir we patna blong hem i kilim ded hem long November 2020, Jeremaiah Noel we oli atakem hem long wan naet klub long September 2020 wetem Angelina Tari we i ded long 2013, saspek blong hem i stap aotsaed naoia from i nokat enaf evidens blong pruvum se hemi kilim ded hem.”

Ms Matas i talem se naoia hemi taem blong yumi nomo mas kat fraet blong wokbaot.

Wokbout ia oli singoutem,’reclaimem bak night we i minim i mas kat ol sef street blong pipol i wokbaot long hem.

Ova 100 man mo women oli kam tugeta long Port Vila City blong tingbout fridom blong muvment mo olgeta we oli lusum laef blong olgeta long ol rapis violens.

Event ia hemi pat blong selebratem International Womens dei long wik ia.

 

 

 

 

(Visited 139 times, 1 visits today)

About The Author

You might be interested in