Woning abaot doti blong toilet long bigfala hospital i extend

Ministry blong Health i kat taem naoia kasem March blong fixim toilet system blong Vila Central Hospital.

Hemia from ol doti blong toilet blong mein i stap ko daon long solwota blong Seaside eria mo polutum solwota.

Communications Ofisa blong Dipatmen blong Water Resource, Molu Bulu, i talem se Minista blong Health, Honoroble Silas Bule, i rispon mo talem se oli kat ol temporari and permanent plan we bae oli wok long hem.

Mr Molu i talem se resen ia nao, dipatmen i disaed blong extendem notis blong faen kasem March yia ia.

Long last yia, dipatmen blong Water Resource i bin kivim wan direksen notis long Ministry blong Health blong mas lukluk long ol doti wota blong toilet bifo December.

Acting Director blong Dipatmen blong Hospital Service, Johnson Wabaiat, i talem se naoia oli stap rikwestem sapot long ol donor patna tru long Department of Strategic Planning and Aid Coordination from kost blong temporari fix hemi VT 1.5 million.

“Mani ia i nokat long budget blong Kavman mekem se wok i nosave ko hed nomo,” Mr Wabaiat i talem.

Jif Joseph Aron Titongoaroto, wan foma Lord Mayor blong Port Vila, we i live long Seaside eria ia i kol long kavman blong luksave ol doti blong toilet we i stap ko daon long solwota long eria ia.

“Ol lida i mas luksave nid blong ol pipol mo sapot,” Jif Titongoaroto i talem.

“Wetem low salari we people oli karem mo impak blong COVID-19 i mekem se ol jif oli mas openem solwota long yia ia blong pipol i karem kakae long solwota afta we oli bin blokem long las yia.

Mr Wabaiat i talem se long 2015,  helt i bin kondaktem finis long eria ia mo oli putum wan kost blong VT 80million blong fixim damej we i stap be ol donor partna oli no save help from hemi sas tumas.

Hemi talem se ol othoriti responsibol oli sud putum wan tabu long solwota we toti i stap ko daon long hem.

Mr Molu i talem  se solwota long Seaside eria hemi no klin olsem solwota long haba blong Port Vila Harbour mbe kasem tete solwota long Port Vila Harbor nomo oli putum tabu  blong ol man oli no swim long hem.

Jif Titongoaroto i talem se nomata long ol doti we i stap ko daon long solwota, smol vilij i kontinu blong yusum wota ia blong huk mo ol pikinini oli swim long hem.

Mr Molu i talem se wanem we hemi sud stap hemi wan propa klin toilet system blong mekem se solid waste hemi flow gud mo distil o wota we oli tritim gud wetem meresin nomo i flow i ko daon long solwota.

 

 

 

 

 

 

 

 

 

 

 

 

 

(Visited 151 times, 1 visits today)

About The Author

You might be interested in