Woning long acid ren

Woning blong acid ren o ren we hemi kat acid we i save bonem ol kakae long garen i stil stap ova long Central mo Saot Vanuatu.

Wan Scientific Ofisa long Vanuatu Meteo mo Geo-Hazards Dipatmen, Dan Tari, i talem se volcano erapsen long Tonga long Satete i mekem plante Sulphur Dioxide gas we i rilis long air.

Mr Tari i talem se satelite foto i soem bigfala amaon blong gas ia long air long wiken.

Mbe oli save putum wan moa apdeit tumoro sapos gas ia long air i ko daon.

“Sapos i kat eni ren mo ol pipol i smelem wan smel we i difren hemi gas ia we i pas long air,”Mr Tari i talem.

“Mbe muvmen blong gas ia hemi dipen nao long wind, i likeli se sapos Wednesday hemi vinis pa yumi putum wan moa mesej bakegen from hemi travel long west saed.

“So long Monday wik ia, gas ia i stap bigwan antap long eria blong Vanuatu mbe tete i luk olsem i stap ko daon lelbet.”

“Sapos ren ia i foldaon long eye mbe bae yu harem eye i sikras. Mo washem gud kakae bifo kuk espeseli ol cabij o nara vegetabol,”Mr Tari i talem.”

Mr Tari i talem se volcano erapsen blong Tonga i no afektem ol volcano blong Vanuatu.

“I nokat eni asosiasen wetem ol volcano blong yumi so taem wan volcano erapsen i hapen samples longwe i no minim se evri volcano bae i erap,”Mr Tari i talem.

Meteo Ofis i talem se ol volcano blong Manaro, Yasur, Gaua oli stil stap long alert volcano 2.

Mr Tari i talem se long level ia bae i stil kat ashfol.

 

 

(Visited 449 times, 1 visits today)

About The Author

You might be interested in