Woning long inkris rice praes long Luganville

Luganville Municipal Council i wonem ol saplaeia blong rice long Luganville blong no yusum COVID-19 pandemic olsem wan opotuniti blong inkrisim praes blong rice.

Long ol pas wik, ol rice saplaeia long Luganville i experiencem shotej blong rice from wan tu manis shipmen dilei.

Konsen i reis long ol pipol we oli stap pem rice se ol bisnis haos i inkrisim praes from wan hae demand mo shotej blong rice.

VBTC Nius i witnesem ol pipol i ras i ko insaed long sto mo line ap blong pem rice long Luganville town las wik.

Luganville Municipal Town Clerk, Jonathan Iavre, i putum aot wan leta long wik ia wonem ol retail sto, wholesale sto, ware haos mo ol prodak saplaeia long town blong Luganville blong no yusum ol disasta olsem COVID-19 pandemic blong dabolem jaj blong ol kakae long sto.

Mr Iavre i talem se ol saplaeia i inkrisim ol praes blong rice blong dabolem revenue long taem blong pandemic ia we i no stret.

Hemi talem se sam sto sale i risal long 40-60 per cen.

Mr Iavre i talem se hemia nao i mekem council i askem ol rice saplaeia long Luganville blong katem daon praes i ko bak long nomol.

Wan Spokespersen blong Esah Corporation Santo, i talem se corporation long wik ia i katem daon praes blong rice.

Hemi talem se sto i katem daon praes blong 18KG bag rice long VT2500 i ko long VT2290.

Spokespersen ia i talem se i kat inkris long praes blong rice nomo from tu manis dilei long rice shipmen long Luganville mo i kat shotej blong rice tu long ol nara saplaeia long Luganville.

VBTC Nius tim long Not i andastan se nomol cost blong 18KG bag blong rice long Luganville i stap long VT1800 kasem 1900.Long taem blong shotej, praes i ko antap long VT 2500 long wan 18 KG bag blong rice. Nomol praes blong wan 25KG bag blong rice hemi stap raon long VT2800 kasem VT 2900. Long taem blong shotej ia praes blong 25KG i ko antap long VT3200.

Long taem naoia sam rice saplaeia i rifilem ol stok afta long shotej.

(Visited 215 times, 1 visits today)

About The Author

You might be interested in