Vanuatu i still wan COVID-19 fri nesen

World Health Organisation i glad long wok blong Kavman blong Vanuatu blong  mekem se Vanuatu i stil COVID-19 fri.

Michael Buttsworth, Representativ blong World Health Organisation i talem se, “World Health Organisation i kongratulatem Vanuatu from fes phase blong repatriation i soem se hemi COVID-19 fri.

Hemi talem se, “Vanuatu i bin mekem wan gudfala wok tumas mo yumi luk risos i wan jalenj from plante pipol i kambak long kaontri mbe kodinasen blong National Disaster Management Ofis, ol health authoriti mo ol nara kavman official i bin wok tugeta mo hemia i gud tumas.”

Hemi talem se seken phase blong repatriation i stap yet long manis August mo wok blong World Health Organisation i blong kivim technical sapot i ko long Department blong Health.

“Mifala i sapot long taem Ministry blong Health i nidim mifala olsem long guideline, kwerentin, incubation period mo ol technical samting we i nid blong manajem process,” Mr Buttsworth i talem.

“World Health Organisation i bin stap wok plante wetem ol health authoriti stat long dei we COVID-19 hemi kam wan wol pandemic.

World Health Organisation ofis long Vanuatu i asurem kavman mo pipol blong hem, se bai i kontinu blong kivim technical sapot mo advisim kavman long ol direksen sapos hemi nidim folem COVID-19 pandemic.